‘6 பந்தில் 6 சிக்ஸர் அடிப்பேன்’…ஜிம்பாப்வே வீரர் அதிரடி அறிவிப்பு: இந்தியாவின் 2 ஸ்பின்னர்களுக்கு எச்சரிக்கை!

இந்திய அணி சமீபத்தில் மேற்கிந்தியத் தீவுகளுக்கு எதிரான டி20, ஒருநாள் தொடர்களில் பங்கேற்று தொடரைக் கைப்பற்றி அசத்திய நிலையில் அடுத்து ஜிம்பாப்வே சென்று ஒருநாள் தொடரில் பங்கேற்க உள்ளது.

இந்த மூன்று போட்டிகள் கொண்ட ஒருநாள் தொடர் வரும் ஆகஸ்ட் 18, 20, 22 ஆகிய தேதிகளில் நடைபெறவுள்ளது. இதற்கான இந்திய அணி சமீபத்தில் அறிவிக்கப்பட்டது. இதில் கே.எல்.ராகுல், ஆவேஷ் கான் இருவர் மட்டுமே ஆசியக் கோப்பையில் விளையாடும் வீரர்களாக இருக்கிறார்கள். ஷுப்மன் கில், சாம்சன், இஷான் கிஷன், ருதுராஜ், திரிபாதி போன்றவர்கள் திறமையை நிரூபிக்க வேண்டிய இடத்தில் இருக்கிறார்கள்.

இந்திய அணி: ஷிகர் தவான் (கேப்டன்), ருதுராஜ் கெய்க்வாட், ஷுப்மான் கில், தீபக் ஹூடா, ராகுல் திரிபாதி, இஷான் கிஷன் (விக்கெட் கீப்பர்), சஞ்சு சாம்சன் (விக்கெட் கீப்பர்), வாஷிங்டன் சுந்தர், ஷர்துல் தாக்கூர், குல்தீப் யாதவ், அக்சர் படேல், அவேஷ் கான், பிரசித் கிருஷ்ணா, முகமது சிராஜ், தீபக் சாஹர்.

ஜிம்பாப்வே அணி:

ஜிம்பாப்வே அணி கடந்த ஜூன் மாதம் ஆப்கானிஸ்தானுக்கு எதிரான மூன்று போட்டிகள் கொண்ட ஒருநாள் தொடரில் பங்கேற்று 60 ரன்கள், 8 விக்கெட்கள், 4 விக்கெட்கள் வித்தியாசத்தில் 3 போட்டிகளிலும் தோற்றது. இதனால், ஜிம்பாப்வே பலம் குன்றிய அணியாகத்தான் பார்க்கப்பட்டது. இந்நிலையில், பார்மில் இருக்கும் வங்கதேசத்திற்கு எதிரான 3 போட்டிகள் கொண்ட ஒருநாள், டி20 தொடர்களில் ஜிம்பாப்வே அபாரமாக செயல்பட்டு 2-1 என்ற கணக்கில் இரண்டு தொடர்களையும் கைப்பற்றி அசத்தியது.

இப்படி ஜிம்பாப்வே அணி திடீர் விஸ்வரூபம் எடுப்பதற்கு முக்கிய காரணம் சிக்கந்தர் ராசா, இன்னொசண்ட், ரியான் பர்ல் ஆகியோர்தான்.

பர்ல் பேட்டி:

இந்த வங்கதேசத்துக்கு எதிரான டி20 போட்டியில் பர்ல் 6 பந்துகளில் 34 ரன்களை குவத்து மிரள வைத்தார். இவர் தற்போது பத்திரிகை ஒன்றுக்குப் பேட்டிகொடுத்த போது, 6 பந்துகளில் 6 சிக்ஸர்களை அடிக்க வேண்டும் என்பதுதான் ஆசைக் கூறினார்.

‘‘6 பந்துகளில் 6 சிக்ஸர்களை அடிக்க வேண்டும் என்பதுதான் எனது ஆசை. இடது கை ஸ்பின்னர்களுக்கு எதிராகத்தான் அடிக்க முயற்சி செய்வேன். யுவராஜ் சிங் எப்படி பிராட் ஓவரில் 6 பந்துகளில் 6 சிக்ஸர்களை அடித்து சாதனை படைத்தாரோ, அதேபோல சாதனை படைக்க வேண்டும் என்பதுதான் எனது ஆசை. யுவராஜ் ஒரு லெஜண்ட் வீரர்’’ எனக் கூறினார்.

இந்திய அணியில் அக்சர் படேல், குல்தீப் யாதவ் ஆகிய இரண்டு ஸ்பின்னர்கள் இடம்பெற்றுள்ளனர். பர்ல் இவர்களுக்கு எச்சரிகை விடும் விதமாகத்தான் பேசியிருக்கிறார் எனக் கருதப்படுகிறது.