தென்காசி மாவட்டத்தின் முக்கிய கோரிக்கைகள் விரைவில் நிறைவேற்றப்படும்; தமிழ்நாடு முதலமைச்சர் மு.க. ஸ்டாலின் உறுதி..
198views
தென்காசி மாவட்டத்தின் முக்கிய கோரிக்கைகள் விரைவில் நிறைவேற்றப்படும் எனவும், வாக்களித்த மக்களுக்கு உண்மையாகவும், உணர்வு பூர்வமாகவும் உள்ளோம் என்றும் தென்காசி மாவட்ட அரசு விழாவில் தமிழ்நாடு முதலமைச்சர் மு.க.ஸ்டாலின் தெரிவித்துள்ளார்.
தென்காசி மாவட்டத்தில் ரூ.182 கோடி மதிப்பில் 1 லட்சம் பேருக்கு நலத்திட்ட உதவிகள் வழங்கும் விழா நடைபெற்றது. விழாவில் ரூ 34 கோடியில் 23 திட்டங்களுக்கு தமிழ்நாடு முதல்வர் மு.க.ஸ்டாலின் அடிக்கல் நாட்டினார். ரூ.22 கோடி மதிப்பிலான முடிவுற்ற பணிகளை துவக்கி வைத்து முதலமைச்சர் பேசியதாவது, தென்காசிக்கு வந்ததுமே இந்த மண்ணைப் போலவே மனமும் குளிர்ந்து வருகிறது. எப்போதும் லேசான தூரல், சாரலாக பெய்து வருவதை பார்க்கும்போது சென்னையை போன்று வெப்பமான இடத்தில் இருந்து வந்த எனக்கு இதமாக இருக்கிறது. ஆண்டுதோறும் குற்றாலத்தில் சாரல் திருவிழா அரசு சார்பாக கொண்டாடப்பட்டு வருகிறது. மேற்கு தொடர்ச்சி மலை அடி வாரத்தில் அமைந்துள்ளது தென்காசி மாவட்டம். குறிஞ்சி, முல்லை, மருதம் ஆகியவற்றை உள்ளடக்கியது தென்காசி மாவட்டம். அதிகமான அருவிகளை கொண்ட மாவட்டம். அணைகள் உள்ள மாவட்டம். மொத்தத்தில் எழில் கொஞ்சும் மாவட்டம் தென்காசி மாவட்டம். வீரத்தின் விளைநிலமாக இருக்கக்கூடிய பூலித்தேவன் மண் இந்த மண். இந்திய விடுதலைக்காக குரல் கொடுத்து ஆங்கிலேயேர்களுக்கு வரி கொடுக்க மறுத்த பூலித்தேவன் மண் இந்த மண். நெற்கட்டான் செவலில் மாவீரன் பூலித்தேவனுக்கு மணிமண்டபம், சிலையுடன் அமைத்து கொடுத்தவர் முன்னாள் முதலமைச்சர் கருணாநிதி. பசும்பொன் முத்துராமலிங்க கல்லூரியை ஆக்கிரமிப்பாளரிடம் இருந்து மீட்டதும் திமுக அரசு. மாவீரன் பூலித்தேவனின் படைத்தளபதியான ஒண்டிவீரனுக்கு மணிமண்டபம் அமைக்க நிதி ஒதுக்கீடு செய்ததும் முத்தமிழ் அறிஞர் கலைஞர்தான். வடக்கே ஒரு காசி உள்ளதை போல தெற்கே ஒரு காசி உருவாக்க வேண்டும் என்பதை மன்னர் பராக்கிரம பாண்டியன் நினைத்து உருவாக்கியது தான் தென்காசி கோபுரம். 500 ஆண்டுகளுக்கு முன்பு கட்டப்பட்ட தென்காசி கோவிலுக்கு ராஜகோபுரம் கட்ட 1960-ம் ஆண்டு நினைத்தபோது திருப்பணிக்குழு தலைவராக நீதிக்கட்சி தலைவர்களில் ஒருவராக பி.டி.ராஜன் நியமிக்கப்பட்டார். பின்னர் மக்கள் திலகம் எம்.ஜி.ஆர். ஆட்சிகாலத்தில் தினத்தந்தி அதிபர் பெருமதிப்பிற்குரிய பா.சிவந்தி ஆதித்தன் அவர்கள் தலைமையில் ஒரு குழு அமைக்கப்பட்டது.
25-06-1990-ம் ஆண்டு தி.மு.க. ஆட்சி காலத்தில் அறநிலையத்துறை அமைச்சராக இருந்த தினகரன் கே.பி. கந்தசாமி தலைமையில் ராஜகோபுரம் குடமுழுக்கு விழா நடத்தப்பட்டது. இப்படி இயற்கைக்கும், ஆன்மீகத்திற்கும், வீரத்திற்கும், விளைச்சலுக்கும் புகழ்பெற்ற தென்காசி மாவட்டத்திற்கு வந்ததற்கு பெரும் மகிழ்ச்சி அடைகிறேன். பூரிப்பு அடைகிறேன். இது அரசு விழாவா? அல்லது கட்சியின் மாநில மாநாடா? என்ற அளவிற்கு மிக பிரமாண்டமாக இந்த விழா நடத்தப்படுகிறது. மாவீரன் பூலித்தேவன் பிறந்த வீரம் நிறைந்த மண் தென்காசிக்கு வருவதில் பெருமை கொள்கிறேன் என்று பேசினார். தென்காசி விழாவில் ரூ.182.56 கோடியில் 1,03,508 பயனாளிகளுக்கு நலத்திட்ட உதவிகள் வழங்கப்பட்டுள்ளன.
ஒரே ஒரு விழாவில் ஒரு லட்சத்துக்கும் மேற்பட்ட பயனாளிகளுக்கு நலத்திட்ட உதவிகள் வழங்கப்பட்டுள்ளது. தென்காசி மக்களின் பிரதான கோரிக்கையான ஜம்பு நதி திட்டம் கடந்த ஆட்சியில் முறையாக அனுமதி வழங்கப்படாததால் திட்டம் தாமதமானது. தற்போது வனத்துறையிடமிருந்து அனுமதி பெறப்பட்டு விட்டது. முறையாக பணிகள் விரைவில் துவங்கும். மக்களால் நிராகரிக்கப்பட்டவர்கள் எரிச்சலால் கேட்கும் கேள்விகளுக்கு நான் பதில் அளிக்க விரும்பவில்லை. வாக்களித்த மக்களுக்கு நாங்கள் உண்மையாக இருக்கிறோம். 19 மாதங்களில் பல்வேறு சாதனைகள்.
இல்லம் தேடி கல்வித் திட்டத்தின் கீழ் 50,390 மாணவர்கள் பலன் பெற்றுள்ளனர். உங்கள் முதல்வர் திட்டத்தின் கீழ் 11,490 மனுக்கள் பெறப்பட்டு 11,400 மனுக்களுக்கு தீர்வு காணப்பட்டுள்ளது. தென்காசி மாவட்டத்தில் இதுவரை 73,491 பயனாளிகளுக்கு பயிர் கடன் மற்றும் நகை கடன் வழங்கப்பட்டுள்ளது. விவசாயம் செழிக்க ரூ.13 கோடி மதிப்பீட்டில் 1,823 புதிய மின் இணைப்புகள் வழங்கப்பட்டுள்ளது. 1,701 குடும்பங்களுக்கு வேளாண் தொகுப்புகள் வழங்கப்பட்டுள்ளது. ரூ.1.95 லட்சம் செலவில் 50 ஆயிரம் பனை விதைகள் விதைக்கப்பட்டுள்ளன. சமூக பாதுகாப்பு திட்டத்தில் ஓய்வூதிய ஆணைகள் வழங்கப்பட்டுள்ளன. சங்கரன்கோவிலில் புதிய கோட்டாட்சியர் அலுவலகம் கட்டப்பட்டுள்ளது. 150 கோவில்களில் 84 அர்ச்சகர்கள், 6 பட்டாச்சாரியார்கள், 60 பூசாரிகளுக்கு மாத ஊக்கத் தொகை வழங்கப்பட்டுள்ளது. தென்காசி மாவட்டத்திற்கான முக்கியமான கோரிக்கைகள் குறித்து கேட்டறிந்து அது தொடர்பாக சற்று முன்னர் அதிகாரிகளிடம் பேசினேன். அதில் முக்கியமான சில கோரிக்கைகளை உடனடியாக நிறைவேற்ற அறிவிப்பை வெளியிடுகிறேன். தென்காசி மாவட்டம் இலத்தூர் ஏரி ரூ.10 கோடி மதிப்பீட்டில் சுற்றுலா தலமாக மாற்றுவதற்கு நடவடிக்கை எடுக்கப்படும். இந்த மாவட்டத்தை சேர்ந்த சண்முகவல்லி என்ற மாணவி இந்திய குடிமை பணி தேர்வில் அகில இந்திய அளவில் 108-வது இடத்தை பிடித்துள்ளார். தமிழக அளவில் 3-வது இடம் பிடித்துள்ளார். அவருக்கு எனது வாழ்த்துக்கள். இந்த மாவட்டத்தில் வினைதீர்த்த நாடார்பட்டியில் உள்ள பள்ளியில் 3-ம் வகுப்பு படிக்கும் ஆராதனா என்ற சிறுமி, எங்களது பள்ளிக்கு கூடுதல் வகுப்பறை கட்டிடம் வேண்டும் என்று எனக்கு கடிதம் எழுதி உள்ளது. இது எனக்கு மிகவும் மகிழ்ச்சியை ஏற்படுத்தி உள்ளது. என் மீது குழந்தைகளும் இவ்வளவு நம்பிக்கை வைத்து கோரிக்கை கடிதம் அனுப்பி உள்ளனர். சிறுமி ஆராதனா வைத்த கோரிக்கையை ஏற்று ரூ.35 லட்சம் மதிப்பில் அந்த பள்ளிக்கு முதல் கட்டமாக 2 வகுப்பறைகள் உடனடியாக கட்ட உத்தரவிட்டுள்ளேன்.
ஒவ்வொருவருடைய தேவையையும், ஒவ்வொருவரின் பிரச்சினையையும் அறிந்து நமது அரசு செயல்படுகிறது. இதனை பொறுத்துக்கொள்ள முடியாமல் எதிர்க்கட்சி தலைவர் விடுபட்ட சில வாக்குறுதிகளை மட்டும் கூறி புலம்பிக் கொண்டிருக்கிறார். மக்களால் நிராகரிக்கப்பட்டவர்களின் எரிச்சல் வார்த்தைகளுக்கு எல்லாம் பதில் அளிக்க விரும்பவில்லை. எங்களை நம்பி வாக்களித்தவர்களுக்கு உண்மையாகவும், உணர்வு பூர்வமாகவும் உள்ளோம். தமிழக மக்கள் இருண்ட காலத்தில் இருந்து உதயசூரியன் காலத்திற்கு வந்துவிட்டனர். இந்தியாவில் தமிழகம் முதலிடம் வரவேண்டும் என்பதே எனது லட்சியம், எனது குறிக்கோள். அனைத்து துறைகளிலும் தமிழகம் உயர்ந்து வருகிறது. இதனை மக்கள் மனதில் நான் கண்டு கொண்டிருக்கிறேன். இந்த ஆட்சி தான் தொடர வேண்டும் என்று கூறி மக்கள் என்னை ஊக்கப்படுத்தி வருகின்றனர். திட்டமிடுவது, திட்டமிட்டதை செயல்படுத்துவது தான் நல்லாட்சிக்கு அடையாளம். அதுதான் எங்கள் இலக்கு.
