கண்ணறியா இமைக் குற்றம்

மனதின் ஓட்டம் மனிதன் கையில்
இருந்தும் அக்கறை கொள்வதில்லை

மந்தியைப் போல எத்தனை தாவல்கள்
அதையும் கண்டு கொள்வதில்லை

கோபம் வெறுப்பு பேச்சு சிரிப்பு
அமைதியைக் காட்டத் தெரியவில்லை

இன்பம் துன்பம் ஒன்றாய்ப் பார்க்கும்
பக்குவம் அதற்கு வரவில்லை

உன்னுள் இருக்கும் தன்னை அறியும்
நேர்மை வளர்க்கும் திறமையில்லை

உன் முன் உன்னை நிறுத்துகின்ற
தைரியம் ஏனோ வரவில்லை

நல்லது கெட்டது சொல்லும் உரிமை
உனக்கே உனக்கது புரியவில்லை

உணர்ச்சிகள் காட்டி உன்னைக் குழப்பும்
மனதை அடக்கத் தோன்றவில்லை

புலன்களை முடுக்கிடும் சாவித் திருடன்
மனமென்று இன்னுமா அறியவில்லை

அருகில் இருந்தும் இமையின் குற்றம்
கண்ணுக்கு ஏனோ தெரிவதில்லை

கவிப்பார்வை
சென்னை