நிழல்

மரத்தடியிலமர்ந்து
நான் எழுதும் முன்பே
என் தாள்களில்
மரம் எழுதியது
ஓர் அழகிய கவிதையை

பறவைகளின் இசைக்கேற்ப
பாடுவதைப் போல்
அது அசைந்து கொண்டேயிருந்தது
ஆனால் அதன் ஓசைகளை
கிளைகள் வைத்திருந்தன

பறக்கும் பறவைகளின் நிழல்களுக்கு
என் தாள்களில் கூடுகள் கிடைக்காமல்
அலைந்துகொண்டேயிருந்தன

நிழலை வரைகிறது
வெளிச்சத் தூரிகை
அசைத்து அழிக்கிறது காற்று

வாசிக்கத் தொடங்கிவிட்டேன்
நிழலின் மொழி
அத்தனைக் குளிர்ச்சியாக இருந்தது.

• பாரிகபிலன்