100views
விடியல் காலை ஐந்து மணி..
ஏர்க்கலப்பையை தோளில் சுமந்தபடி கிளம்பினார் சின்னையா.
பெரிய லோட்டா நிறைய நீராகாரத்தை நீட்டி இதைக் குடிச்சிட்டு கிளம்புங்க.. நெற்றியில் திருநீறு பூசியபடி வந்தவர் திண்ணையில் அமர்ந்து நீராகாரத்தை பருகியவர் பன்னண்டு மணிக்கு சாப்பாடு எடுத்து வந்துடு புள்ள.. இப்பல்லாம் பசி தாங்க முடியல.வெளவெளன்னு வருது.
சரிங்க மாமா.. பத்து மணிக்கு அந்த வேலுப்பயலை கொஞ்சம் அனுப்பி வைங்க.. நான் கேப்பைக்கஞ்சி கொடுத்து அனுப்பறேன்.அலுப்பு பாக்காம குடிச்சிட்டு வேலை பாருங்க.. வேலை செய்ய உடம்பில தெம்பு வேணாமா?
12மணிக்கு சோறு எடுத்தாறேன்.நீங்க தெம்பா இருக்கனுமுல…
சரிம்மா.. அதுக்கு நீ ஏன் கண்ணு கலங்குற? காலையில இப்படி வழி அனுப்பினா நான் எப்படி நிம்மதியா வேலை செய்ய முடியும்? நான் நல்லாத்தான் இருக்கேன்.அடிக்கிற. வெய்யிலுல உடம்பு களைச்சிப் போவுது..நீ கவலைப்படாதே.. நான் கிளம்பறேன்..
அவர் தூரமாக மறையும் வரை நின்று பார்த்துக் கொண்டு இருந்தவள்,
வைரம் பாய்ந்த உடம்புன்னு நெனைச்சேனே.. இப்படி அடிக்கடி மயக்கம் வருதுன்னு சொல்றாங்களே! ஒரே கவலையா இருக்கே.. அம்மா..தாயே.. மகமாயி!நீதாம்மா காப்பாத்தனும்..
புலம்பியபடி உள்ளே சென்றவள் தூங்கிக் கொண்டிருந்த பிள்ளைகளை எழுப்பினாள். நண்டு சிண்டா இருக்குதுங்களே..இதுங்களை எப்படி கரை சேர்க்கப் போறேன்?
என்ன சின்னையா? ஊரே டிராக்டர்ல உழுதுக்கிட்டு இருக்கு! நீ என்னடான்னா இன்னும் ஏரு… கலப்பன்னு சரியான பொழைக்கத் தெரியாத ஆளாக இருக்கியே! உரம் போட மாட்டேங்குற …பூச்சி மருந்து அடிக்க மாட்டேங்குற …என்னையா நடக்குது?
மாடு வச்சு ஏரு உழும்பொழுது அதோட சாணியே உரமாயிடுது .பூச்சி புழு திங்கிறதுக்கும் சாப்பாடு வேணும் இல்ல.. சாப்பாட்டுக்கு அதுங்க எங்க போவுங்க ? என் வயலுலேயாவது வயிறு நிறைய சாப்பிடட்டும் .மீந்து போற அரிசி என் குடும்பத்துக்கு போதும். செயற்கை உரத்த அடிச்சு என் வயலை வீணாக்க விரும்பல. என் வயலுக்கு எவ்வளவு கிளி குருவி எல்லாம் வருது! உங்க வயல்ல ஏதாவது ஒன்னு வருதா? நீங்க தான் இத பத்தி எல்லாம் யோசிக்கணும் .நான் சொன்னா எங்க கேக்குறீங்க?
அது சரி …நான் உன்னைய திருந்தச்சொன்னா நீ என்னைய திருந்தனுமுன்னு சொல்லுற?உன்னை திருத்த முடியாது ..உன்கிட்ட வாய் கொடுத்து மீள முடியாது ..ரெண்டு பிள்ளைங்க இருக்கு ..அதுங்கள கர சேர்க்கணும். ரெண்டும் பொட்ட புள்ள வேற பெத்து வச்சிருக்கற? பார்த்து நடந்துக்க …அவ்வளவுதான் நான் சொல்லுவேன் .
பக்கத்து வயலுக்கு சொந்தக்காரரான வடிவேல் சொல்வதையே அந்த ஊரில் உள்ள அனைவரும் கூறினாலும் எல்லோரும் அவரை மனதிற்குள் பாராட்டிக் கொண்டுதான் இருந்தார்கள்.
தான் வசிக்கும் கூரை வீட்டுக்குள்ளே ஆங்காங்கு நெல் கதிர்களை கட்டி தொங்க விட்டிருப்பார் .அதனை கொத்தி திங்கவரும் புறாக்கள்.. சிட்டுக்குருவிகள் என இவர் வீடு எப்போதும் பறவைகளின் சத்தத்தோடு இருக்கும் .உள்ளே பயன்படுத்தி வெளியேறும் அத்தனை நீரும் தோட்டத்தில் உள்ள செடிகளுக்கு பாயும் . இதனால் எப்போதும் வீட்டை சுற்றி பச்சை பசேல் என தேடிக்கொடிகள் ஏராளமாக செழித்து வளர்ந்திருக்கும். காய்கறிகள். பூச்செடிகள் என ரம்யமாய் இருக்கும் இவரது வீடு …மாடு கோழி வாத்து புறா சிட்டுக்குருவி காகம் குயில் பச்சைக்கிளி என இவர் வளர்க்கும் பறவைகளும் வளர்க்காத பறவைகளும் என ஒரே காச் மூச்சு என்ற சத்தத்துடன் சுற்றி வருவதை பார்க்க ஆச்சரியமாகவும் இருக்கும்.
வயல்ல வேலை செஞ்சி அலுத்து போய் சாயந்திரமா வீடு திரும்பினா இதுங்களோட மல்லு கட்றதிலேயே அவருக்கு உடம்பு சரியில்லாமல் போயிடுது …..எல்லாத்தையும் புடிச்சி வித்துர போறேன் …தரகரே! நல்ல ஆளா இருந்தா சொல்லுங்க …வாங்கி அடிச்சுகிட்டு சாப்பிடுறவங்க வேண்டாம்! பிள்ளைங்க மாதிரி வளத்துட்டோம்..அவங்களும் வளர்க்கறவங்களா இருக்கனும் புரியுதா ?
சரிமா பார்த்து சொல்றேன் !
அவர் கிளம்பவும் சின்னையா உள்ளே வரவும் சரியாக இருந்தது.இவன் ஏன் இங்கே வந்துட்டு போறான்?
சும்மாதான்… ரோட்டோரமா போனாங்க ..என்னை பார்த்ததும் சும்மா விசாரிச்சிட்டு போறாங்க …மோரு ஒரு வாய் கொடுத்து அனுப்பி வைச்சேன்.
அப்படியா !சரி ….
இடத்தை சுத்தப்படுத்தி மாடுகளை குளிப்பாட்டி எல்லாத்துக்கும் தீனி போட்டு அதுங்களோட கொஞ்சி சிரிச்சு உள்ளே வர குழந்தைகள் வீட்டுப்பாடம் செய்து கொண்டிருந்தார்கள்.
