‘பொது சிவில் சட்டத்தை அமல்படுத்துவது பற்றி ஆய்வு செய்து பரிந்துரைக்கும்படி மத்திய அரசு கேட்டுக் கொண்டால், அதை ஆய்வு செய்ய 22வது சட்ட கமிஷனுக்கு நேரம் குறைவாக உள்ளது’ என, சட்ட கமிஷன் வட்டாரங்கள் தெரிவித்தன.நாட்டில் பொது சிவில் சட்டத்தை அமல்படுத்த வேண்டும் என்பது, பா.ஜ.,வின் கொள்கைகளில் ஒன்றாக உள்ளது.மத்தியில் பிரதமர் மோடி தலைமையில், 2014ல் பா.ஜ., ஆட்சி அமைந்த பின், பொது சிவில் சட்டம் தொடர்பான அம்சங்களை ஆய்வு செய்யும்படி, 21வது சட்ட கமிஷனுக்கு மத்திய சட்ட அமைச்சகம் பரிந்துரைத்தது.இது பற்றி முழுமையாக ஆய்வு செய்வதற்குள், 21வது சட்ட கமிஷனின் பதவிக்காலம் 2018ல் முடிந்தது.
இதையடுத்து, 22வது சட்ட கமிஷனை, 2020ம் ஆண்டு பிப்., 24ல் மத்திய அரசு அமைத்தது. இதன் பதவிக்காலம், அடுத்த ஆண்டு முடிகிறது.இதற்கிடையே, பொது சிவில் சட்டம் பற்றி, கடந்த பார்லி., கூட்டத்தொடரில், லோக்சபாவில் பா.ஜ., உறுப்பினர் நிஷிகாந்த் துபே கேள்வி எழுப்பினார். இதற்கு சட்ட அமைச்சர் கிரண் ரிஜிஜு அளித்த பதிலில், ‘பொது சிவில் சட்டத்தில், மக்களின் உணர்வுகள் தொடர்பான அம்சங்கள் அடங்கியுள்ளன.’இது பற்றி முழுமையாக ஆய்வு செய்வதற்குள், 21வது சட்ட கமிஷனின் பதவிக்காலம் முடிந்துவிட்டதால், 22வது சட்ட கமிஷனுக்கு பரிந்துரைக்கப்படும்’ என கூறியிருந்தார்.
இந்நிலையில், இது குறித்து சட்ட கமிஷன் வட்டாரங்கள் கூறியதாவது:பொது சிவில் சட்டம் பற்றி ஆய்வு செய்ய அரசு பரிந்துரைத்தாலும், அதை ஆய்வு செய்ய 22வது சட்ட கமிஷனுக்கு நேரம் இல்லை.22வது சட்ட கமிஷனில், தலைவர் உட்பட பல இடங்கள் காலியாக உள்ளன.மேலும், சட்ட கமிஷனின் பதவிக்காலம், அடுத்த ஆண்டு பிப்ரவரியுடன் முடிகிறது. அதனால், பொது சிவில் சட்டம் பற்றி, 22வது சட்ட கமிஷனால் முழுமையாக ஆய்வு செய்ய முடியாது. இவ்வாறு சட்ட கமிஷன் வட்டாரங்கள் தெரிவித்தன.
