12-வது ஜூனியர் (21 வயதுக்கு உட்பட்டோர்) உலக கோப்பை ஆக்கி போட்டி ஒடிசா தலைநகர் புவனேஸ்வரில் உள்ள கலிங்கா ஸ்டேடியத்தில் நடந்து வருகிறது. இதில் பங்கேற்றுள்ள 16 அணிகள் 4 பிரிவாக பிரிக்கப்பட்டு லீக்கில் மோதி வருகின்றன. லீக் சுற்று முடிவில் ஒவ்வொரு பிரிவிலும் முதல் இரு இடங்களை பிடிக்கும் அணிகள் கால்இறுதிக்கு தகுதி பெறும்.
இதில் ‘பி’ பிரிவில் நேற்று நடந்த லீக் ஆட்டம் ஒன்றில் பிரான்ஸ் அணி 11-1 என்ற கோல் கணக்கில் கனடாவை துவம்சம் செய்தது.
இதே பிரிவில் இரவில் நடந்த மற்றொரு ஆட்டத்தில் நடப்பு சாம்பியனான இந்தியா 8-2 என்ற கோல் கணக்கில் போலந்தை ஊதித்தள்ளியது. இந்திய அணி தரப்பில் துணை கேப்டன் சஞ்சய் (4-வது, 58-வது நிமிடம்), அரஜீத் சிங் (8-வது, 60-வது நிமிடம்), சுதீப் சிர்மாகோ (24-வது, 40-வது நிமிடம்) தலா 2 கோலும், உத்தம் சிங் (34-வது நிமிடம்), ஷர்தானந்த் திவாரி (38-வது நிமிடம்) தலா ஒரு கோலும் அடித்தனர்.
இந்த பிரிவில் பிரான்ஸ் (3 வெற்றி) 9 புள்ளிகளுடன் முதலிடத்தையும், இந்தியா (2 வெற்றி, ஒரு தோல்வி) 6 புள்ளிகளுடன் 2-வது இடத்தையும் பிடித்து கால்இறுதியை எட்டின. கால்இறுதியில் இந்திய அணி, பெல்ஜியத்தை சந்திக்கிறது.
முன்னதாக ‘ஏ’ பிரிவில் நடந்த கடைசி கட்ட லீக் ஆட்டங்களில் மலேசியா 4-3 என்ற கோல் கணக்கில் தென்ஆப்பிரிக்காவையும், பெல்ஜியம் 3-0 என்ற கோல் கணக்கில் சிலியையும் தோற்கடித்தது. இந்த பிரிவில் 2 வெற்றி, ஒரு டிராவுடன் பெல்ஜியம், மலேசியா அணிகள் தலா 7 புள்ளிகள் பெற்று சமநிலை வகித்தன. கோல் வித்தியாசம் அடிப்படையில் பெல்ஜியம் முதலிடத்தையும், மலேசியா 2-வது இடத்தையும் பெற்று கால்இறுதிக்குள் கால் பதித்தன.
