இந்த சீனியர் வீரரை எடுத்தால் நியூசிலாந்து அணியை திணறடிக்கலாம்; செம அட்வைஸ் கொடுத்த பிரட் லீ !!
நியூசிலாந்து அணிக்கு எதிரான போட்டிக்கான இந்திய அணியில் ரவிச்சந்திர அஸ்வினுக்கு இடம் கொடுக்க வேண்டும் என முன்னாள் ஆஸ்திரேலிய வீரர் பிரட் லீ தெரிவித்துள்ளார்.
நடப்பு டி.20 உலகக்கோப்பை கிரிக்கெட் தொடரில், தனது முதல் போட்டியிலேயே பாகிஸ்தானை எதிர்கொண்ட விராட் கோலி தலைமையிலான இந்திய அணி, பாகிஸ்தான் அணியிடம் மிக மோசமான தோல்வியை தழுவியது. பேட்டிங், பந்துவீச்சு என இரண்டிலுமே சொதப்பியதால் இந்திய அணி 10 விக்கெட் வித்தியாசத்தில் தோல்வியடையும் நிலை ஏற்பட்டது.
பாகிஸ்தான் அணி அடுத்தடுத்த மூன்று போட்டிகளில் தொடர் வெற்றி பெற்று அரையிறுதி சுற்றுக்கே தகுதி பெற்றுவிட்ட நிலையில், இந்திய அணிக்கோ இரண்டாவது போட்டியே நாளை (அக்.,31) தான் நடைபெற உள்ளது. கிட்டத்தட்ட வாழ்வா சாவா போட்டியாக பார்க்கப்படும் இந்த போட்டியில் இந்திய அணி நியூசிலாந்தை எதிர்கொள்ள உள்ளது.
இந்தியா பாகிஸ்தான் இடையேயான போட்டிக்காக காத்திருந்ததை போன்றே, நியூசிலாந்து அணிக்கு எதிரான போட்டிக்காகவும் ஒட்டுமொத்த இந்திய ரசிகர்களும் மிகுந்த ஆவலுடன் காத்துள்ளனர். ஒட்டுமொத்த கிரிக்கெட் உலகமும் இந்த போட்டியை எதிர்பார்த்து காத்துள்ளதால், முன்னாள் வீரர்கள் பலர் இரு அணிகளுக்கும் தேவையான தங்களது ஆலோசனைகளை வழங்கி வருகின்றனர்.
அந்தவகையில், இந்தியா நியூசிலாந்து இடையேயான போட்டி குறித்து பல்வேறு விசயங்கள் பேசி வரும் முன்னாள் ஆஸ்திரேலிய வீரரான பிரட் லீ, இந்திய அணியில் ரவிச்சந்திர அஸ்வினுக்கு இடம் கொடுக்க வேண்டும் என தெரிவித்துள்ளார்.
இது குறித்து பிரட் லீ பேசுகையில், ‘ரவிச்சந்திர அஸ்வின் சம்கால கிரிக்கெட் உலகின் மிகசிறந்த வீரர். நான் அஸ்வினின் மிகபெரும் ரசிகன். அஸ்வின் அதிக அனுபவம் கொண்ட வீரர், அவரால் சூழ்நிலையை உணர்ந்து விளையாட முடியும். ஒவ்வொரு போட்டியில் அஸ்வின் அணிக்கு தேவையானதை மிக சரியாகவே செய்து கொடுத்து வருகிறார். என்னை பொறுத்தவரையில் நியூசிலாந்து அணிக்கு எதிரான போட்டியில் அஸ்வினுக்கு இடம் கொடுப்பது இந்திய அணிக்கு கூடுதல் பலத்தை கொடுக்கும்’ என்று தெரிவித்துள்ளார்.
