அபுதாபியில் நடைபெற்ற ஐ.பி.எல். கிரிக்கெட்டில் சன்ரைசர்ஸ் ஐதராபாத் அணி 4 ரன் வித்தியாசத்தில் பெங்களூரு ராயல் சேலஞ்சர்ஸ் அணியை வீழ்த்தி திரில் வெற்றி பெற்றது.
டாஸ் வென்ற பெங்களூரு அணி பந்துவீசத்தீர்மானித்தது. இதனையடுத்து பேட் செய்த ஐதராபாத் அணியில் தொடக்க வீரர் அபிஷேக் சர்மா 13 ரன்களில் ஆட்டமிழந்தார். பின்னர், 2-வது விக்கெட்டுக்கு இணைந்த ஜேசன் ராய் – கேப்டன் வில்லியம்சன் இணை நிதானமாக ஆடி ரன் சேர்த்தது. சீரான இடைவெளியில் பவுண்டரிகளாய் விளாசிய இந்த ஜோடியில், வில்லியம்சன் 31 ரன்களில் ஆட்டமிழந்தார். அரைசதம் அடிப்பார் என எதிர்பார்க்கப்பட்ட ராய் 44 ரன்களில் வெளியேறினார். 20 ஓவர்களில் சன்ரைசர்ஸ் ஐதராபாத் அணி 7 விக்கெட் இழப்புக்கு 141 ரன்கள் சேர்த்தது.
142 ரன்னை இலக்காகக் கொண்டு பின்னர் களமிறங்கிய பெங்களூரு அணியில் கேப்டன் விராட்கோலி 5 ரன்னில் ஆட்டமிழந்தார். அவரைத் தொடர்ந்து கிறிஸ்டியன் 1 ரன்னிலும், ஸ்ரீநகர் பாரத் 12 ரன்னிலும் விக்கெட்டை பறிகொடுத்தனர். 4-வது விக்கெட்டுக்கு தேவ்தத் படிக்கல் – மேக்ஸ்வேல் இணை நம்பிக்கை அளித்தாலும் இருவரும் அடுத்தடுத்து விக்கெட்டுக்களை தாரை வார்த்தனர். இறுதிஓவரில் பெங்களூருவின் வெற்றிக்கு 13 ரன்கள் தேவைப்பட்டநிலையில் அந்த அணி இலக்கை எட்ட முடியாமல் 6 விக்கெட் இழப்புக்கு 137 ரன்களே சேர்க்க முடிந்தது. இதன் மூலம் சன் ரைசர்ஸ் ஐதராபாத் அணி 4 ரன் வித்தியாசத்தில் வாகை சூடியது.
