உலகின் மிக சிறந்த வீரர் என்பதை மீண்டும் நிரூபித்த ஜோ ரூட்; மனதார பாராட்டும் இந்திய ரசிகர்கள் !!
இந்திய அணிக்கு எதிரான மூன்றாவது டெஸ்ட் போட்டியில் சதம் அடித்து அசத்தியுள்ள இங்கிலாந்து கேப்டன் ஜோ ரூட்டிற்கு சமூக வலைதளங்களில் பாராட்டுக்கள் குவிந்து வருகிறது.
இங்கிலாந்து சென்றுள்ள இந்திய கிரிக்கெட் அணி, இங்கிலாந்து அணியுடன் ஐந்து டெஸ்ட் போட்டிகள் கொண்ட தொடரில் பங்கேற்றுள்ளது.
இந்த தொடரின் முதல் போட்டி டிராவில் முடிந்தது. இதனையடுத்து நடைபெற்ற இரண்டாவது டெஸ்ட் போட்டியில் இந்திய அணி 151 ரன்கள் வித்தியாசத்தில் மிரட்டல் வெற்றி பெற்றிருந்த நிலையில், இரு அணிகள் இடையேயான மூன்றாவது டெஸ்ட் போட்டி இங்கிலாந்தின் லீட்ஸில் தற்போது நடைபெற்று வருகிறது.
இதில் டாஸ் வென்று முதலில் பேட்டிங் செய்த இந்திய அணிக்கு ஒரு பேட்ஸ்மேன் கூட சொல்லிக்கொள்ளும் அளவிற்கு ரன் குவித்து கொடுக்காததால் வெறும் 78 ரன்களில் இந்திய அணி அனைத்து விக்கெட்டுகளையும் இழந்தது.
இதனையடுத்து முதல் இன்னிங்ஸை துவங்கிய இங்கிலாந்து அணிக்கு ரோரி பர்ன்ஸும், ஹசீப் ஹமீதும் துவக்க வீரர்களாக களமிறங்கினர்.
போட்டியின் முதல் ஓவரில் இருந்தே இந்திய அணியின் பந்துவீச்சை இந்த ஜோடி மிக எளிதாக எதிர்கொண்டது. முதல் விக்கெட்டுக்கு 135 ரன்கள் சேர்த்திருந்த போது ரோரி பர்ன்ஸ் (61) விக்கெட்டை இழந்தார், மற்றொரு துவக்க வீரரான ஹசீப் ஹமீத் 68 ரன்கள் எடுத்து கொடுத்தார்.
இதன்பின் கூட்டணி சேர்ந்த டேவிட் மாலன் – ஜோ ரூட் ஜோடி இந்திய அணியின் பந்துவீச்சை ஒரு பொருட்டாகவே மதிக்காதது போல் அசால்டாக ரன் குவித்தது. நீண்ட நேரம் இந்திய பந்துவீச்சாளர்களின் பொறுமையை சோதித்த இந்த கூட்டணியை நீண்ட நேரம் போராட்டத்திற்கு பிறகு தான் இந்திய பந்துவீச்சாளர்கள் பிரித்தனர். டேவிட் மாலன் 70 ரன்களில் விக்கெட்டை இழந்தபிறகு களத்திற்கு வந்த பாரிஸ்டோ (29), பட்லர் (7) போன்ற வீரர்கள் சொதப்பினாலும், மறுமுனையில் ஜோ ரூட் தனது வழக்கமான ஆட்டத்தை வெளிப்படுத்தி மளமளவென ரன் குவித்து சதமும் அடித்து அசத்தியுள்ளார்.
இந்திய அணிக்கு எதிரான இந்த டெஸ்ட் போட்டியில் சதம் அடித்ததன் மூலம் பல்வேறு சாதனைகளும் படைத்துள்ள ஜோ ரூட்டிற்கு சமூக வலைதளங்களில் வாழ்த்துக்கள் குவிந்து வருகிறது. இந்திய ரசிகர்களே ஜோ ரூட்டை மனதார பாராட்டி வருகின்றனர்.
