இது எப்ப நடந்துச்சு?..!சிம்புவை இயக்கும் ‘பீஸ்ட்’ பட இயக்குனர் நெல்சன்… வைரல் புகைப்படம்…
நயன்தாரா கோலமாவு கோகிலா திரைப்படம் மூலம் இயக்குனராக அறிமுகமானவர் நெல்சன் திலீப்குமார். நகைச்சுவை கலந்து அவர் எடுத்த அந்த திரைப்படம் ரசிகர்களை பெரிதும் கவர்ந்தது. அப்படம் மூலமாகவே யோகிபாபுவுக்கு பல பட வாய்ப்புகளும் கிடைத்தது. அதன்பின் சிவகார்த்திகேயன் நடித்த ‘டாக்டர்’ திரைப்படத்தை இயக்கி முடித்துள்ளார். கொரோனா பரவல் காரணமாக தியேட்டர்கள் மூடப்பட்டிருப்பதால் இப்படம் இன்னும் வெளியாகவில்லை.
இப்படத்திற்கு பின் நடிகர் விஜயை வைத்து பீஸ்ட் திரைப்படத்தை அவர் இயக்கி வருகிறார். இப்படம் விஜய் ரசிகர்களிடையே பெரும் எதிர்பார்ப்பை ஏற்படுத்தியுள்ளது. இப்படத்தின் போஸ்டர்கள் சமீபத்தில் வெளியாகி வரவேற்பை பெற்றது. இப்படத்தின் படப்பிடிப்பு விரைவில் சென்னையில் துவங்கவுள்ளது.
இந்நிலையில், நடிகர் சிம்புவுக்கு நெல்சன் காட்சியை விளக்கும் புகைப்படம் ஒன்று வெளியாகியுள்ளது. சிம்பு எப்போது நெல்சன் படத்தில் நடித்தார் என ரசிகர்கள் குழப்பம் அடைந்தனர்.
உண்மையில், 2010ம் ஆண்டு தனது முதல் படமாக சிம்புவை வைத்து ‘வேட்டை மன்னன்’ திரைப்படத்தை இயக்கினார் நெல்சன். இப்படத்தில் சிம்புவுக்கு ஜோடியாக ஹன்சிகா நடிக்க சில நாட்கள் படப்பிடிப்பு நடைபெற்றது. ஆனால், சில காரணங்களால் இப்படம் நின்று போனது. அப்போது எடுக்கப்பட்ட புகைப்படம்தான் இது என்பது தற்போது தெரியவந்துள்ளது. இந்த புகைப்படத்தை சிம்பு ரசிகர்கள் இணையத்தில் பகிர்ந்து வருகின்றனர்.
