துபாய் நூலகத்துக்கு தமிழக தொழிலதிபர் ஏ.ஜே. கமாலின் வாழ்க்கை வரலாறு குறித்த ஆங்கில நூல் அன்பளிப்பு

துபாய் :

துபாய் நகரின் மிகவும் பிரமாண்ட நூலகம் முஹம்மது பின் ராஷித் நூலகம் ஆகும்.  இங்கு அரபு, ஆங்கிலம், தமிழ் உள்ளிட்ட பல்வேறு மொழிகளில் ஆயிரக்கணக்கான நூல்கள் உள்ளன.  இந்த நூலகத்துக்கு அதன் அலுவலர் அப்துல் ரஹ்மானிடம் தமிழக தொழிலதிபர் ஏ.ஜே. கமாலின் வாழ்க்கை வரலாறு குறித்து எழுதப்பட்ட ‘அன் ஐகான் ஆப் பெர்சிவியரன்ஸ் – கீழக்கரை ஏ.ஜே.கமால் அன் இன்ஸ்பையரிங் ரோல் மாடல்’ (விடாமுயற்சியின் அடையாளம் – கீழக்கரை ஏ.ஜே. கமால்: அனைவருக்கும் ஊக்கமளிக்கும் முன்னுதாரணம் ) என்ற ஆங்கில நூலை ஆட்டோவிஷன் நிறுவனத்தின் இயக்குநர் முகம்மது பைரோஸ் அன்பளிப்பாக வழங்கினார்.

இந்த நிகழ்ச்சியில் அலைடு மோட்டார்ஸ் நிறுவனத்தின் மேலாண்மை இயக்குநர் ஏ.ஜே.கமால், நூலாசிரியர்கள் அப்துல் மஜீத், திருநெல்வேலி சதக்கத்துல்லா அப்பா கல்லூரியின் ஓய்வு பெற்ற ஆங்கிலத்துறை பேராசிரியர் அப்துல் காதர், இந்திய யூனியன் முஸ்லீம் லீக் மாநில கொள்கை பரப்பு செயலாளர் எல்.கே .எஸ். மீரான் முகைதீன், பொறியாளர் செய்யது அகமது, அமீரக காயிதேமில்லத் பேரவை தலைவர் ஏ. முகம்மது தாஹா, மின்னணு ஊடகத்துறை செயலாளர் அகமது கபீர், மூத்த ஊடகவியலாளர் முதுவை ஹிதாயத் உள்ளிட்டோர் பங்கேற்றனர்.

அதன் பின்னர் நூலகத்தில் அமைந்துள்ள அருங்காட்சியகம், மொழித்தோட்டம் உள்ளிட்ட பல்வேறு பகுதிகளையும் பார்வையிட்டனர். அப்போது அவர்கள் நூலகத்தின் பிரமாண்டம் குறித்தும், இதனை உருவாக்கிய அமீரக துணை அதிபரும், பிரதமரும், துபாய் ஆட்சியாளருமான மேதகு ஷேக் முகம்மது பின் ராஷித் அல் மக்தூம்-ன் திட்டங்கள் குறித்தும் பெருமிதம் தெரிவித்தனர்.