தென்காசி மாவட்ட தலைமை மருத்துவமனையில் தேசிய மருத்துவர் தின விழா; பள்ளி குழந்தைகளுடன் கொண்டாட்டம்:
115views
தென்காசி மாவட்ட அரசு தலைமை மருத்துவமனையில் நடைபெற்ற தேசிய மருத்துவர் தின விழா மருத்துவர்கள் மற்றும் பள்ளி குழந்தைகள் இணைந்து இனிப்புகள் வழங்கி சிறப்பாக கொண்டாடப்பட்டது. தேசிய மருத்துவர் தினத்தை முன்னிட்டு தென்காசி மாவட்டம் வடகரை ஜாய் மெட்ரிக் மேல் நிலைப் பள்ளியில் இருந்து பள்ளியின் இயக்குனர் அகஸ்டின் ஜோசப் தலைமையில் சுமார் 100 குழந்தைகள் வருகை தந்து மருத்துவர்கள் ஒவ்வொருவருக்கும் வெளி நோயாளி பிரிவில் சென்று மருத்துவர் தின வாழ்த்துக்களை கூறி பூக்களை பரிசாக வழங்கினர்.
தென்காசி தலைமை மருத்துவர் மரு. ஜெஸ்லின், பள்ளி குழந்தைகளை மருத்துவமனை கண்காணிப்பாளர் அலுவலகத்திற்கு அழைத்து அவர்களோடு கலந்துரையாடினார். அனைத்து மருத்துவர்களும் குழந்தைகளுடன் சேர்ந்து கேக் வெட்டி மருத்துவர் தினத்தை மகிழ்ச்சியுடன் கொண்டாடினர். கண்காணிப்பாளர் மருத்துவர் ஜெஸ்லின் குழந்தைகளை பாராட்டி, இனிப்புகள் வழங்கி ஆலோசனைகள் வழங்கினார். நிகழ்ச்சியின் தொடர்ச்சியாக 100 மரக்கன்றுகளை குழந்தைகளுடன் சேர்ந்து மருத்துவர்கள் தென்காசி மருத்துவமனை வளாகத்தில் நட்டு வைத்ததுடன் அதனை தாங்களே தொடர்ச்சியாக பராமரிப்போம் எனக் கூறியது அனைவரையும் நெகிழ்ச்சி பட செய்தது. மேலும் மருத்துவமனை கண்காணிப்பாளர் மருத்துவர் ஜெஸ்லின் கூறும் போது, இந்த வருட மருத்துவர் தினத்தை பள்ளி குழந்தைகளுடன் கொண்டாடியது, மருத்துவர்கள் அனைவரும் பள்ளி குழந்தைகளுடன் கலந்துரையாடியது மிகவும் மகிழ்ச்சியான நிகழ்வு எனக் குறிப்பிட்டார்.
