காற்றில் கரையும் கவிதை

தனியாக சிரிக்கும்
போதெல்லாம்
அம்மா கேட்கிறாள்
காரணம் என்னவென்று
எப்படிச் சொல்ல
நீ என்று

சாலையை கடக்கும்
போதெல்லாம்
அனிச்சையாய்
என் புறம் நீளும்
அவன் கரங்களுக்கு தான்
எத்தனைக்காதல் என் மீது

நம் வரவை எதிர்நோக்கும்
அம்புலிக்கு எப்படிச் சொல்வது
நீயும் நானும்
ஊடலில் இருப்பதை

FLAMES போட்டு பார்த்தேன்
வரவில்லை M
நம்பிக்கையில்லா தீர்மானம்
கொண்டைவரப்பட்டு
மூட நம்பிக்கையில் சேர்க்கப்பட்டது
FLAMES

அவனிடம்
என்ன பேசவேண்டும்
என்ற யோசனை
இரவுகளும்
எப்படி பேச என்ற
தயக்கங்களில் பகலும்
கழிகிறது

ரா.சண்முகவள்ளி ஸ்ரீனிவாசன்
தென்காசி