மஞ்சுளா யுகேஷ் – கவிதை

கனவு கண்டேன்
கனிவான இதயங்கள்
கவலையற்ற மனிதர்கள்
களிப்பான முகங்கள் காண
கனவு கண்டேன்

கண்டங்கள் தாண்டியும்
அண்டங்கள் தேடியும்
கண்ட கனவு போல்
கிடைக்காதா என ஏங்கியே
கனவு கண்டேன்

எங்கும் கிடைக்கவில்லை
எளிதில் சிக்கவில்லை
என்ன இது சோதனை
என இறைவனை கேட்பது போல்
கனவு கண்டேன்

கடகடவென சிரித்து
கடவுள் சொன்னார்
புறக்கண்ணால் பார்க்காதே
புலப்படாது என்றார்
அகக்கண்ணால் பார்
அனைவரும் நல்லவரே
ஆனந்தம் மிக்கவரே எனக்கூறி
ஆண்டவன் மறைந்தார் போல்
கனவு கண்டேன்

கனவு கலைந்தாலும்
கண் திறக்காமல் பார்த்தேன்
புறக்கண் மூடியதால்
அகக்கண்ணால் பார்த்தேன்
ஆண்டவன் சொன்னது
அற்புதம் என அறிந்தேன்

• மஞ்சுளா யுகேஷ், துபாய்